4 траўня ў другой лізе чэмпіянату Беларусі па футболе «Мёры» забілі ў вароты каманды «Расоны» 50 мячоў. Гулец «Мёраў» Філіп Рудзік, вядомы з выступаў за наваполацкі «Нафтан», барысаўскі БАТЭ і гродзенскі «Нёман», расказаў падрабязнасці гульні, паведамляе Betnews.by.
«Мы згулялі матч, які не прынёс ніякага задавальнення. Мы проста гулялі, куражыліся, забівалі галы і не думалі, што столькі хайпу падымем», — сказаў Рудзік.
Паводле яго, «Расоны», якія прапусцілі 50 мячоў, «гулялі нармальна»:
— Я не хачу іх крыўдзіць і нават хачу падзякаваць. Яны малайцы, што прыехалі на матч, і гулялі нармальна. Не жорстка, не білі нас па нагах, а спрабавалі гуляць у футбол. Ясна, што ў іх мала разумення гэтай гульні. Але мы не хацелі прынізіць хлопцаў ні ў якім разе. Мы проста забівалі галы. Тут, хутчэй, пытанне ў тым, што «Расоны» павінныя гуляць з іншымі ўмоўнымі «Расонамі», з камандай з іншага пасёлка, супастаўнай з ёю па ўзроўні. Вось і ўсё.
Сам Рудзік забіў 5 галоў і аддаў 20 (!) перадач.
«У нас у камандзе хлопцы, галодныя да галоў, ёсць моладзь, якая вельмі хацела забіць. Каб вы разумелі, крайні паўабаронца забіў 13 мячоў. Не форвард, а крайні паўабаронца! У некалькіх гульцоў па 5−6 галоў. Фішка была ў тым, каб кожны забіў», — заявіў Філіп, які ў свой час правёў чатыры матчы за нацыянальную зборную.
Гулец «Мёраў» сказаў, што гледачы «спачатку актыўна пляскалі», але пасля двух-трох мячоў «такой цікавасці да футбола з іх боку ўжо не было».
