Былы польскі суддзя Томаш Шміт, які ўцёк у Беларусь, заявіў пра стварэнне ўласнага прапагандысцкага праекта. Працаваць над ім ён збіраецца запрасіць экс-рэдактара NEXTA Рамана Пратасевіча.
Былы польскі суддзя Томаш Шміт, які ўцёк у Беларусь, абвясціў пра адкрыццё ў Мінску фонду «Польская праўда». Паводле яго, гэтая арганізацыя сярод іншага будзе займацца «ўмацаваннем дружбы, узаемаразумення і згоды паміж грамадзянамі ЕС, Беларусі і Расіі і дапамогай у абароне тых грамадзян, чые правы парушаюць на тэрыторыі Еўрасаюза». Таксама фонд будзе расказваць пра «еўрапейскіх і амерыканскіх палітыкаў, іх сувязі са спецслужбамі і карупцыю».
Паводле інфармацыі расійскага інфармагенцтва Sputnik Беларусь, Шміт хоча прыцягнуць да працы ў фондзе і экс-рэдактара NEXTA Рамана Пратасевіча.
Шміт адзначыў, што яму трэба яшчэ будзе пагаварыць з Пратасевічам пра гэта, але экс-суддзя зацікаўлены ў працы з ім.
«Ён (Раман Пратасевіч. — Заўв. рэд.) добра ведае, як працуюць сацыяльныя медыя, такія людзі мне патрэбныя. Першы крок — трэба сустрэцца і пагаварыць. Я думаў пра ягоную кандыдатуру, ведаю, хто ён, але мы яшчэ не сустрэліся», — сказаў Шміт, не ўдакладніўшы, на якой менавіта пасадзе бачыць Пратасевіча.
Ці прыме Пратасевіч прапанову паляка, невядома: сам экс-рэдактар NEXTA яе не каментаваў. Цяпер ён працуе электразваршчыкам на Мінскім электратэхнічным заводзе (МЭТЗ) імя У.І. Казлова і сцвярджае, што «мужыкі-зваршчыкі» з досведам у іх у цэху атрымліваюць па 9−10 тысяч рублёў у месяц.
Нагадаем, Томаш Шміт збег з Польшчы ў Мінск у пачатку траўня, тады ён даў прэс-канферэнцыю, падчас якой папрасіў прытулку ў беларускіх уладаў. Ён заявіў, што на радзіме «зазнаў пераслед і пагрозы за самастойную палітычную пазіцыю». У Беларусі ён уладкаваўся на працу журналістам у дзяржаўнае інфармацыйнае агенцтва БЕЛТА.
Між тым у Польшчы Шміт быў замяшаны ў так званым хейтарскім скандале з удзелам сваёй жонкі, праз што часова быў адхілены ад сваіх абавязкаў. Таксама на радзіме на яго заведзеная крымінальная справа па падазрэнні ў шпіянажы.
Раман Пратасевіч — экс-рэдактар тэлеграм-каналаў NEXTA і «Беларусь галаўнога мозгу». 23 траўня 2021 года самалёт, на якім ён ляцеў з расіянкай Соф’яй Сапегай з Афін у Вільнюс, прымусова пасадзілі ў Мінску.
Сапегу ў траўні 2022 года асудзілі на шэсць гадоў калоніі па справе «Чорнай кнігі Беларусі». Пасля 13 месяцаў зняволення яе памілавалі.
3 траўня 2023 года Пратасевіча асудзілі на восем гадоў пазбаўлення волі з адбываннем пакарання ў калоніі. 22 траўня таго ж года яго памілавалі.